Am 6. Juli , wie gäng vor de Ferie s’letschte Mou,
isch Besammlig bim Veloständer „Bleichematt“.
Die het sech aber zu Kopp’s verschobe, i däm Fall,
werum,… steit ufem’ne angere Blatt…
Wo 11 Froue mit „Drohtesle“ parat si gstange,
het d’Verschiebig zum „Eichholz“agfange.
Dört si zwöi Froue derzue denn cho,
womer denn d’Golfschlegle hei übernoh.
U scho het dr Hindernis-Parcours gstartet,
Bärguf-Bärgab, Muuseloch u Ameisehügel hei uf üs gwartet.
Nach 4 “Hole in one’s“ vor Sibe u 18 Loch
simer fertig gsi, u hei gfunge doch,
jetz isch Zyt u dr Hunger gross,
ab uf d‘ „Esle“ u denn los…
Dr Röbu het scho uf üs gwartet
u dr Pizza-Ofe gstartet.
Mit huufe, huufe feine Sache,
heimer üsi Pizzas säuber dörfe mache.
Wo denn die „Büüchli“ gfüut si gsy
heimer bim’ne feine Gläsli Wy,
gluegt wär dr „Parcours“ het gwunne,
u derbi usegfunge,
dass die Drü wo am Schluss „putzt“ hei,
d’Blätter vom Eichholz säuber i dr Hand hei…
Merci vüu mou Lisa + Röbu, schön isch’s gsi,
Bericht: Gisela Bläsi
