13 Turnerinne hei sich am Samstig 20. August am 7.15 Uhr bim RBS troffe. Üsi Reiseleiterinne s Ursi Hofer und s Thesi Kaufmann hei üs is schöne Toggeburg nach Mogelsberg gfüehrt.
Mit ere chline Stärkig hei mir scho gli e Wettberwerb müesse usfülle, was nid aune grad liecht isch gfaue. Nachre churze Wanderig hei mir de ändlich üses verdiente Kafi übercho, bevor mir üs ufgmachte hei zum Baumwipfelpfad. E mega cooli Sach, mit eme Rundgang ir Höchi vo de Baumwipfel, sehr zum empfähle. Nachem Mittagässe isches witergange mit Wandere bis Necker. Dr Wätterbricht ir Ostschwitz het Räge agä. Alles hei mir ipackt: Rägehose und Jacke, Schirm und Huet. Aber wenn Englein reisen… es paar Rägetröpfli und scho het üs d Sunne über die zwe Täg begleitet.
Bim warte ufs Poschti hei mir «i packe mini Koffere und nime mit» gspüut. Wär dänkt, üsi Hirni sige igrostet, tüscht sich. Zwe Rundi mit 13 Turnerinne hei mir problemlos gschafft. De isch aber zum Glück s Poschti cho wo üs uf Oberhelfenschwil gfüehrt het.
Nachere Stärkig mit Kafi und Glace ischs witergange mit Wandere. Immer chli ufe und ufe. Eis isch zur Entlastig vo de Füess immer wieder mou Barfuess ungerwägs gsi. Nach 2 Sund hei mir de üses Ziel, d Käserei Berghof in Aewil, erreicht. E wunderschöni Ussicht, es schöns Restaurant und tolli Unterkunft heinis erwartet. Nachem gniesse vom feine, aber au verdiente Apero isch Zimmerbezug, Dusche und zwägmache fürs Znacht agseit gsi.
S Vreni und dr Melchior Schoch hei üs miteme feine Cordon Bleu verwöhnt. Nach Spiele und Lafere isch de scho gli Nachtrueh agseit gsi. Nid ohni wichtigi Feststellige z mache. Zur bessere Übersicht vo Zahnbürstli und Co chame aus i Gmüesseckli verpacke. So hesch aus im Überblick und muesch Zähn nid mit Fenistil putze.
Am Sunntig hei mir üs nacheme feine Zmorge ufe Wäg gmacht dur Brueder-Döbeli-Schlucht nach Dietfurt. E happegi, schöni Wanderig. Immer abe und abe dur d Schlucht.
Ab jetz hei mir üs de dörfe lo verwöne. Mit Ross und Wage hei mir die feine Grillade gnosse uf üsere Kutschenfahrt. Üse Kutscher, dr Beni het üs durchs schöne Toggeburg gfüehrt. Uf em Grillwage hei mir e tolli Stimmig gha. Au dank em Appezeller. Au wenn eis Grimasse het gmacht, wenn`s e Schluck het gno, isches haut Medizin gsi für die chischteri Stimm. Es hett drfür de au chli sini Brille entlastet, und es Nückerli gno. 42 Chrütter, steuet euch mou vor, bis si die aui gfunge hei, die 42 Chrütter! Do muesch gäng wieder e Schluck näh, villicht fingsch jo use, was im Dibidäbi aus drin isch.
Zfriede, mit viu schöne Idrück, Lache, Lafere und Gniesse hei mir üs de ufe Heiwäg gmacht.
Es Härzlichs Dankeschön as Ursi und s Thesi. Dir heit üs es riesig tolls Wucheänd bote.
Bericht: Lisa Kopp, Fotos: Ursi Hofer
Link zum Fotoalbum
